Sherry week 2018

Verda er full av kule folk. Og kjipe folk også, naturligvis. Men med internett og sosiale forum har det vorte lettare å kome i kontakt med fleire av desse kule folka. Eg er busett i Førde, har familie og jobb, og difor vert det ikkje mykje tid til å reise ut i verda å treffe kule folk, fysisk. Eg sit derfor i mitt elefenbeinstårn, utan å ta del i alt som skjer i vinverda.

Elfenbenstårn, dikterens opphøyde fjernhet fra tidens problemer, først brukt i 1837 av kritikeren Sainte-Beuve om dikteren Alfred de Vigny. Senere er uttrykket ofte brukt nedsettende i forbindelse med diktere (evt. andre kunstnere, forskere el.l.) som isolerer seg fra samfunnet og fra menneskelig engasjement. (Store norske leksikon)

Men så hender det at verda kjem til deg. Ruben Luyten driv den fine sida sherrynotes.com, noko han har gjort sidan 2013. Her er det mykje nyttig info om sherry for både nybegynnarar og sherry-geeks. I sommar annonserte han etter 15 personar som kunne delta på ein interaktiv twitter-smaking av fem ulike sherry. Eg fekk napp, og nokre veker seinare kunne eg heise ein boks med fem små prøveflasker med sjeldan sherry, opp til elfenbeinstårnet mitt. Tysdag 9. oktober kl 1900 CET sat det 15 sherry-fans i 10 ulike land klare med vinglas, tastatur og emneknaggen #SherryTT. Dersom du er ein del av denne mikroblogg-tenesta, gå gjerne til enmeknaggen og les. Dette var fyrste gong eg har vore med på noko slikt på Twitter, og eg trur nok at noko mindre komplekst, som for eksempel ein fotballkamp, er lettare å følgje med på, enn 15 ulike røyster i mange trådar og undertrådar.

Nuvel, vinane var iallefall strålande, og eg vil slenge med notata mine under. Men fyrst; tema var altså årgangs-sherry. Noko som er svært sjeldan, sidan omlag alt av sherry er blanda i ein type solera. Eit solera-system har fleire fordelar. For det fyrste vil den yngre vinen som vert tilsett i den litt eldre vinen, ta til seg smak, karakter og kvalitet. For det andre er ikkje mengden basevin eller druer som er tilgjengelig i ein årgang, bestemmande for mengen vin som kan seljast. Dersom marknaden etterspør meir vin, kan det takast ut meir. Dersom det er stille kan vinen haldast i soleraen. Ei jamn tilførsel av ung vin er også naudsynt for at floren på fino og manzanilla skal kunne haldast ved like.

Årgangsvin frå Jerez kan altså berre friskast opp med vin av same type og år. Ettersom fordampinga er ganske stor i regionen, 3-4% i året, vil det bli lite vin igjen når vinen er mogen og klar for flasketapping. Sidan årgangsvin er så sjeldan, vert dei stort sett tappa på flaske når dei er ganske gamle. Dei fleste årgangsvinar er palo cortado eller oloroso, sidan floren gjerne vil døy når det ikkje vert tilført yngre vin der det framleis er næringsstoff for floren. Ein palo cortado er ein vintype som startar som fino, men der floren døyr eller vert teke livet av ved å sprite opp vinen til 18-19%. Så utviklar vinen seg oksidaivt resten av tida på fat. Oloroso er vin som ved fyrste klassifisering vert merka som litt mindre fin og elegant enn fino, og han vert sprita opp til 18% og går inn i ein solera med oksidativ lagring.

Denne smakinga viste korleis gode og interessante fat kan få skine gjennom ikkje å gå inn i ein solera, men få utvikle seg som årgangssherry og sidan bli tappa nærast ufiltrert. Kvart fat lever sitt eige liv. Det er klart at det er vanskelig å oppnå ein konsistent kvalitet i årgangssherry, men det er vel heller ikkje vitsen. Eg vonar at ein auka interesse for god sherry, vil gje eit insitament til bodegaene om å halde fram med å leggje til side nokre fleire fat som kan bli årgangsvin.

Callejuela Manzanilla 2012 4/11 Bota No 5

Djup strågul. Luktar av salt tang og kamomille, med eit avrunda og nesten søtt preg. Rart. Rund og vinøs i høve til dei fleste manzanilla som er slanke, lyse og knusktørre. Smaken er intens og med fint mandelpreg. Her er ei vekt og fylde som ikkje er vanlig i manzanilla. Denne går mot amontillado i stil. Eg finn salte kjeks, litt sitrus og kvitmuggost. Sær og svært god manzanilla! Fjerde tapping av denne vinen som vart fyllt på elleve fat i 2012. Vil nok verte endå meir oksidativ og amontillado-prega i framtidige tappingar. 15% alkohol.

Valdespino Macharnudo Alto Palo Cortado 2000

Gyllen oransje. Aromaene nærast hoppar ut av glaset. Smørolje, karamell og byggesettlim i starten, før ei bølgje av tørka frukt. Med litt lufting roar vinen seg litt og vert svært så elegant. Det kjem fram lukt av fiken og appelsin. I munnen er vinen intens og tørr, men svært elegant. Lys og ganske lett på tå til å vere palo cortado. Det smakar av treverk, fiken og frekke sigarar. Lang og kompeks ettersmak. Kanskje kveldens vin. 20% alkohol.

Williams & Humbert Oloroso Colección Añadas 2001

Lys oransje. Parfymert og med vare tonar av fin tobakk, sitrus og tørka frukt. Rik, men tørr. Det smakar av tørka frukt og treverk. Lys og rein til oloroso å vere. Lang tørr ettersmak. Likte denne veldig godt. 21% alkohol, tappa i 2017.

Gonzalez-Byass Palo Cortado 1987

Fargen er mørk oransje mot lys brun. På nasen er dette ein fruktig palo cortado med sviske og syrlige bær, byggesettlim og treverk. Fyldig og tung på lukt. Smaken følgjer opp. Dette er kveldens fyldigaste og mest lukka vin. Rik, tørr og smak av tørka frukt og treverk. Ein liten rest på dag to er betre. Vinen har fått opna seg opp og blitt meir elegant. 21,5% alkohol. Tappa i 2015.

Lustau Añada 2000 Dulce

Raudlig tawnyfarga vin. Det luktar søtt av dadlar og gamle fat. Rik, søt og fyldig vin. Bra syre som balanserer restsukkeret. Denne er laga om lag som ein “vanlig” søt sterkvin, ved at palomino-druer er hausta seint, og så vert gjæringa stoppa med tilsetjing av sprit. Det vanlige i Jerez er å blande søte vinar av px med oloroso for å få ein type cream sherry. 21% alkohol, tappa i 2017.

Dagen etter smakinga skreiv François Chartier, ein canadisk vinskribent som var med på førebuing og gjennomføring av eventet, dette på twitter: “So proud! The Sherry Twitter tasting I was co-hoasting last night reaches 4 million impacts in one hour!!! #SherryTT

Ein tanke på “Sherry week 2018

Leave a Reply