Med tradisjonar attende til 1827, 15 år i partnerskap med Formel 1, og raudt band som hommage til Æreslegionen på både flaske og i namnet, så skulle jo alt leggja til rette for ein omtykt og distingvert veteran i vinverda. I staden overhøyrer eg vinen forakteleg omtalt i same andedrag som Blue Nun. Det har neppe hjelpt særpreget å produsera 8 millionar flasker årleg, ei heller å vera eigd av Pernod Ricard – alkoholverdas svar på Unilever. Kan det verkeleg stå så ille til?   

Mumm Cordon Rouge Brut

Champagne, Frankrike. 45 % Pinot Noir (frå Reims og Aube), 30 % Chardonnay (frå mellom anna Côte des Blancs) og 25 % Pinot Meunier (frå Marne og Reims). Til vinen er det henta druer frå 77 eller meir enn 120 marker – alt etter kven i konsernet du spør. 30 eller 36 månader på botnfallet…    

Gule eple, søtleg ananas, limeskal og aprikos. Litt hamburgerbrød i bakgrunnen. Svært fruktig snute.

Lett munnkjensle, Granny Smith, fersken og litt honning. Bittersyrleg lime-avslutning med anstendig lengde.

Rein, men kjedeleg sjampanje på den ekstremt fruktige sida, som heilt sikkert har sin plass ein varm dag i ei uformell setting. For så vidt godt til kvit pizza med dagens nyplukka kantarell, men legg heller på 30 kroner og kjøp ei flaske Coutier i staden.

Musikkbonus: Dagger Moth – The Sun is a Violent Place

Pandemiprosjekt frå heimestudioet i 2022 av den italienske gitaristen Sara Ardizzoni. Dystre vokal-tema får lag på lag av manipulerte gitarar, industrielle beats og kløktig bruk av elektronikk.

 Brutalt forførande blanding av Stian Westerhus, Robert Fripp, Art of Noise og PJ Harvey, der ho lagar heilt unike lydlandskap med ein fenomenal gitarteknikk.   

Kjelder:

https://www.mumm.com/
https://daggermothmusic.bandcamp.com/
Richard Juhlin – En duft av Champagne